Futbol ýyldyzy Kriştianu Ronaldu täze ugra gadam basýar. «Al-Nasr» klubunyň hüjümçisi Britaniýa futbolynyň aňyrsyndaky uly pullar, agentler we çylşyrymly gatnaşyklary görkezýän täze drama serialynyň ýerine ýetiriji prodýuseri bolar.

Ronaldu diňe kamera aňyrsynda galmaz. Habarlara görä, ol serialyň käbir sahnalarynda hem peýda bolar. Häzirki wagtda onuň özüniň oýnajakdygy ýa-da başga bir keşpde çykyş etjekdigi entek belli däl.

«Day 1s» serialy näme barada?
Täze taslama «Day 1s» diýlip atlandyrylýar. Serial Britaniýanyň professional futbolyndaky agentler dünýäsini, futbolçylar bilen klublaryň arasyndaky gatnaşyklary we uly maliýe bähbitlerini suratlandyrar. Baş gahryman — abraýly futbol agenti Stenli Daltonyň keşbini meşhur aktýor Damian Lewis ýerine ýetirýär. Ol «Homeland», «Billions» we «Band of Brothers» seriallaryndaky rollary bilen tanalýar.

MahabatTürkmenstandartlary Baş Döwlet Gullugy

Ronaldu we Tierri Anri hem taslama gatnaşýar
Ronaldu serialyň ýerine ýetiriji prodýuserleriniň biri bolar. Şeýle hem öňki fransuz futbolçysy Thierry Henry hem bu taslama gatnaşar diýlip garaşylýar. Serialyň ideýasy Anriniň hakyky agenti Darren Dein tarapyndan işlenip taýýarlanyldy. Şonuň üçin futbol agentleriniň hakyky tejribelerinden peýdalanylmagy mümkin. Taslamada britaniýaly repçi Dave we ýaş aktrisa Karlotta Banat hem agzalýar.

Surata düşüriliş işleri başlandy
Serialyň surata düşürilişi eýýäm başlandy. Käbir sahnalar Londonyň demirgazyk-günbataryndaky «Barnet» klubunyň stadionynda düşürilýär. Bu taslama diňe baý we şöhratly futbol dünýäsini däl, eýsem Britaniýa futbolynyň gündelik we hakyky taraplaryny hem görkezmegi maksat edinýär.

Drama, ýöne ýeňil pursatlar hem bolar
«Day 1s» esasy taýdan drama serialy hökmünde häsiýetlendirilýär. Onda futbol biznesiniň ýapyk taraplary, gepleşikler, garşylyklar we agentleriň täsirli dünýäsi görkeziler. Şol bir wagtda serialda käbir gülkünç sahnalar hem bolar. Emma ol doly komediýa däl, esasan çynlakaý drama görnüşindäki taslama bolar.

Ronaldu kino biznesine ýol açýar
«Day 1s» Ronaldu bilen režissýor we prodýuser Matthew Vaughn tarapyndan döredilen UR•Marv Studios tarapyndan taýýarlanýar. Metyu Won «Kingsman», «Kick-Ass» we «X-Men: First Class» ýaly filmleri bilen meşhurdyr. Bu taslama Ronaldunyň futbol karýerasyndan soňky media we kino ugurlaryndaky işleriniň başlangyjy bolup biler. Emma bu onuň ýakyn wagtda futboly terk etjekdigini aňlatmaýar.

Serial haçan çykar?
Häzirki wagtda serialyň haýsy platformada görkeziljekdigi, çykjak senesi we bölümleriniň sany resmi taýdan yglan edilmedi. Ýöne Ronaldunyň dünýä derejesindäki meşhurlygy, Damian Lewis ýaly aktýoryň gatnaşmagy we futbol temasy sebäpli Netflix, Amazon Prime Video ýa-da beýleki platformalaryň taslama gyzyklanma bildirmegi mümkin.

«THE ASHGABAT TIMES».