Hytaýly işläp taýýarlaýjylar Olimpiýa çempiony Usain Boltdan has çalt ylgap bilýän we häzirki zaman ýeňil atletikaçylaryndan ýokarrak böküp bilýän täze gumanid (adam şekilli) roboty — «Unitree Superman» tanyşdyrdylar.
Bu barada Hançjou halkara ylym we tehnologiýa innowasiýa merkeziniň wekilleri sosial ulgamlarda habar berdiler.
Robotyň iň ýokary tizligi 45 km/sagada ýetýär. Bu görkeziji dünýäniň iň çalt ylgaýjylarynyň biri bolan Usain Boltyň 44,7 km/sagatlyk rekord görkezijisinden hem ýokarydyr.
Mundan başga-da, gumanid robot dik ýagdaýda duran ýerinden 2 metrden gowrak aralyga böküp bilýär.
Prototipi döretmek işleri üç aýdan gowrak wagt dowam etdi. Taslamany taýýarlaýjylar robotyň häzirki görnüşiniň heniz soňky wersiýa däldigini we ony has-da kämilleşdirmek üçin uly mümkinçilikleriň bardygyny bellediler.
Öndürijiniň maglumatyna görä, «Unitree Superman» şu hepdäniň ahyrynda Pekinde geçiriljek robotlaryň Olimpiýa oýunlaryna gatnaşar.
«THE ASHGABAT TIMES».
Teswirler
Entek teswir ýok. Ilkinji bolup pikiriňizi ýazyň.