Hytaý kosmos giňişligindäki galyndylary gözegçilikde saklamak we emeli hemralaryň çaknyşmak howpuny azaltmak üçin ýörite niýetlenen täze emeli hemra toparyny işe girizdi. Bu ulgam kosmosdaky howply jisimleri yzarlamak, olaryň hereketini seljermek we geljekdäki çaknyşyklaryň öňüni almak üçin döredildi.

Kosmosda häzirki wagtda müňlerçe işjeň emeli hemra bilen birlikde, işden çykan raketa bölekleri, köne hemralaryň bölekleri we beýleki ownuk galyndylar hereket edýär. Bu zatlar örän ýokary tizlikde uçýandygy sebäpli, hatda kiçi bölekler hem işleýän kosmos enjamlaryna uly howp döredip biler.

Täze emeli hemralar toplumy kosmos galyndylaryny tapmak we yzarlamak; olaryň orbitasyny hasaplamak; çaknyşmak ähtimallygyny öňünden kesgitlemek; kosmos enjamlarynyň howpsuzlygyny ýokarlandyrmak üçin maglumat bermek maksady bilen ulanylar.

MahabatTürkmenstandartlary Baş Döwlet Gullugy

Habarda bellenilişine görä, bu taslama Hytaýyň kosmos howpsuzlygy boýunça mümkinçiliklerini ösdürmek ugrunda möhüm ädimdir. Ýurtda soňky ýyllarda emeli hemralaryň sany çalt artýar, şonuň üçin kosmos giňişligindäki hereketi gözegçilikde saklamak zerurlygy hem ýokarlanýar.

Kosmos galyndylary diňe bir Hytaý üçin däl, eýsem, ähli ýurtlaryň kosmos maksatnamalary üçin umumy mesele bolup durýar. Halkara kosmos stansiýasy we beýleki köp sanly emeli hemralar şeýle howplardan gaça durmak üçin yzygiderli gözegçilik we hasaplamalara mätäç bolýar.

«THE ASHGABAT TIMES».