Soňky ýyllarda dünýäde ykdysady, ylmy we tehnologik ösüşleriň çaltlaşmagy ýokary bilim ulgamynyň döwrebaplaşdyrylmagyny möhüm zerurlyga öwürdi. Şu nukdaýnazardan, Türkmenistanda ýokary hünär bilim ulgamyny uzak möhletleýin esasda ösdürmäge gönükdirilen «Türkmenistanda ýokary hünär bilimini ösdürmegiň 2026 — 2052-nji ýyllar üçin Strategiýasy» hem-de ony amala aşyrmak boýunça 2026 — 2030-njy ýyllar üçin çäreleriň meýilnamasy ýurduň bilim ulgamynda täze ösüş tapgyryny açýar.

Bu strategik resminamanyň esasy maksady ykdysadyýetiň dürli pudaklary üçin ýokary bilimli, giň dünýägaraýyşly, döredijilikli we halkara derejede bäsleşige ukyply hünärmenleri taýýarlamakdan ybaratdyr. Şeýle hem ýokary okuw mekdepleriniň ylmy mümkinçiliklerini ösdürmek, sanly bilim ulgamyny giňden ornaşdyrmak, halkara hyzmatdaşlygy pugtalandyrmak we bilim hyzmatlarynyň hilini dünýä derejesine ýetirmek esasy ugurlar hökmünde kesgitlenýär.

Strategiýanyň ilkinji tapgyry bolan 2026 — 2030-njy ýyllar üçin çäreleriň meýilnamasy bolsa bu uzak möhletleýin maksatlara ýetmekde başlangyç we düýpli özgertmeleri öz içine alýar. Bu döwürde ýokary okuw mekdepleriniň okuw maksatnamalaryny döwrebaplaşdyrmak, täze hünär ugurlaryny — esasan hem, maglumat tehnologiýalary, emeli aň, ýaşyl ykdysadyýet we energetika ýaly möhüm ugurlary girizmek, sanly bilim platformalaryny ösdürmek, ylmy-barlag merkezlerini güýçlendirmek hem-de halkara hyzmatdaşlyk mümkinçiliklerini giňeltmek ýaly möhüm çäreler amala aşyrylar. Şeýle hem professor-mugallym düzüminiň hünär derejesini ýokarlandyrmak, ýaşlaryň amaly tejribe almak mümkinçiliklerini artdyrmak we bilim ulgamynyň halkara standartlara laýyklygyny üpjün etmek göz öňünde tutulýar.

MahabatTürkmenstandartlary Baş Döwlet Gullugy

Bu strategiýanyň ähmiýeti örän giňdir. Ilki bilen, ol ýurduň ykdysady ösüşi üçin zerur bolan ýokary derejeli hünärmenleriň taýýarlanylmagyna şert döredýär. Ikinjiden, bilim ulgamynyň hilini ýokarlandyryp, onuň halkara giňişlige çykmagyna mümkinçilik berýär. Şeýle hem strategiýa innowasion ykdysadyýeti ösdürmäge, ylmy-tehniki ösüşi güýçlendirmäge we ýaşlaryň mümkinçiliklerini giňeltmäge uly goşant goşýar. Mundan başga-da, ýurdumyzyň dünýä bilim giňişligindäki ornuny berkitmäge hyzmat edýär.

Netijede, bu strategik resminama Türkmenistanda ýokary hünär bilim ulgamyny düýpli kämilleşdirmäge gönükdirilen möhüm döwlet başlangyjydyr. Ol diňe bir bilim ulgamynyň ösüşine däl, eýsem ýurduň umumy ykdysady, ylmy we jemgyýetçilik ösüşine hem güýçli itergi berer.

Umyda JUMAKULYÝEWA,
Seýitnazar Seýdi adyndaky TDMI-niň Pedagogika fakultetiniň Mekdebe çenli terbiýäniň nazaryýeti we usulyýeti kafedrasynyň mugallym-öwrenijisi.