Nemes awtoulag öndürijisi «Audi» özüniň iň uly we kaşaň flagman modeli bolan täze Audi Q9 krossowerini köpçülige hödürledi. Ixbt.com-yň maglumatlaryna görä, bu ägirt uly awtoulag kompaniýanyň meşhur A8 sedanyna gytaklaýyn mirasdüşer hökmünde çykyş edip, esasy bäsdeşleri hökmünde BMW X7 hem-de Mercedes-Benz S-Class modellerini saýlap alýar. Bu barada Autocar.co.uk habar berýär.

Esasan, Demirgazyk Amerika we Ýakyn Gündogar bazarlarynyň talaplary göz öňünde tutulyp döredilen bu ulag örän ýokary derejeli awtoulag bolmaga dalaş edýär. Awtoulagyň ölçegleri hakykatdan hem täsir galdyryjy: uzynlygy 5,3 metr, ini 2,2 metr, beýikligi bolsa 1,8 metr. Bu görkezijiler ony nemes bäsdeşlerinden hem uly edýär we Beýik Britaniýa ýaly dar köçeli ýurtlarda dolandyrmagy kynlaşdyryp biljek iň uly awtoulaglaryň birine öwürýär.

Salondaky amatlylyklar we öňdebaryjy tehnologiýalar
«Audi» Q9 müşderilere iki dürli içerki konfigurasiýada hödürlenýär. Standart görnüşi ýedi orunlyk bolsa, has amatly alty orunlyk görnüşinde ikinji hatarda iki sany aýratyn garaşsyz oturgyç ýerleşdirilýär.

MahabatTürkmenstandartlary Baş Döwlet Gullugy

Mundan başga-da, awtoulagyň ýanyna baranyňyzda gapylar awtomatiki ýagdaýda açylyp-ýapylýar. Olary merkezi ekran arkaly ýa-da ýörite mobil programma arkaly hem dolandyrmak bolýar. Gapyldaky ýörite sensorlar bolsa geçip barýan beýleki awtoulaglaryň ýa-da welosipedçileriň ýolunda gapynyň tötänleýin açylmagynyň öňüni alýar.

Öň paneliň dizaýny A6 we Q7 modellerinden tanyş bolan üç ekranly arhitektura esaslanýar. Olar:
11,9 dýuýmlyk sanly gurallar paneli;
14,5 dýuýmlyk egri görnüşli multimediýa ekrany;
öňdäki ýolagçy üçin niýetlenen 12,3 dýuýmlyk aýratyn displeý.

«Audi» kompaniýasynyň baş direktory Gernot Döllneriň bellemegine görä, bu sanly interýer brendiň meşhur filosofiýasyny täze derejä çykarýar.

Täze bazar talaplary we awtoulagyň geljegi
Gernot Döllneriň sözlerine görä, Audi Q9 kompaniýanyň geljekde haýsy ugurda ösjekdigini we has ýokary derejeli awtoulag segmentine ymtylýandygyny aýdyň görkezýär. Şol bir wagtyň özünde, modelde esasy maksatly bazarlaryň zerurlyklaryny kanagatlandyrmak üçin ýönekeý, ýöne amaly çözgütler hem ulanylypdyr. Mysal üçin, ABŞ bazaryndaky soňky tendensiýalara laýyklykda, käse goýujy bölümler bir litrlik suw gaplaryny ýerleşdirip biljek görnüşde taslanypdyr.

Takmynan bahasy 100 000 funt sterlingden başlanmagyna garaşylýan bu ägirt uly krossower dünýä awtoulag bazarynda kaşaň ýol-ýolsuz ulaglar segmentindäki bäsdeşligi has-da güýçlendirer.

«THE ASHGABAT TIMES».