«Lenovo» täze «ThinkCentre X Tower» kompýuterini dünýä bazaryna çykaryp başlady. Ilkibaşda Hytaýda tanyşdyrylan bu enjam indi Demirgazyk Amerika we Ýewropa bazarlarynda hem hödürlenýär. Onuň tehniki mümkinçilikleri we ýokary bahasy tehnologiýa hünärmenleriniň ünsüni çekdi.
Iň ýokary derejeli konfigurasiýasynyň bahasy Beýik Britaniýada 10 480 funt sterling bolup, bu takmynan 14 müň ABŞ dollaryna deňdir. Bu görnüşde kompýuter Intel Core Ultra 9 285 prosessory we 256 GB operatiw ýat (RAM) bilen üpjün edilýär.
Kompýuteriň esasy aýratynlyklary iki sany grafiki kartanyň parallel işlemegine mümkinçilik berýär. Käbir konfigurasiýalarda NVIDIA GeForce RTX 5060 Ti grafiki kartalary ulanylýar. Iň güýçli görnüşlerinde 256 GB DDR5-6400 CUDIMM ýady we birnäçe M.2 SSD üçin ýer bar. Enjamda kuwwatly 1200 wattlyk tok üpjünçiligi ulanylýar.
Gyzykly tarapy, Hytaý bazarynda iki sany RTX 5060 Ti grafiki kartaly görnüşiniň bahasy takmynan 5300 dollar töweregi bolsa-da, Günbatar ýurtlarynda şol bir derejedäki konfigurasiýalaryň bahasy has ýokary bolup çykýar.
«ThinkCentre X Tower», esasan, adaty öý ulanyjylary üçin däl-de, professional işler üçin niýetlenendir. Ol çylşyrymly grafiki işlerde, emeli aň algoritmleri bilen işlemekde, uly maglumat toplumlaryny gaýtadan işlemekde ulanylmak üçin döredilipdir.
«THE ASHGABAT TIMES».
Teswirler
Entek teswir ýok. Ilkinji bolup pikiriňizi ýazyň.